ഇലക്ട്രിക് വാഹനങ്ങൾക്കുള്ള നികുതി ഇളവ് നീട്ടി തമിഴ്നാട്

പുതിയ ഇലക്ട്രിക് വാഹനങ്ങൾക്കുള്ള പൂർണ നികുതി ഇളവ് 2 വർഷത്തേക്കു കൂടി നീട്ടി തമിഴ്നാട് ഉത്തരവിറക്കി. 2023 ജനുവരി 1 മുതൽ 2025 ഡിസംബർ 31 വരെ പ്രാബല്യമുണ്ട്. ഇതോടെ പുതിയ വാഹനം വാങ്ങുന്നവർക്ക് വിലയുടെ 8% പണം ലാഭിക്കുന്നതു തുടരാം. റജിസ്ട്രേഷൻ ഫീസായ 500 മുതൽ 1,500 രൂപ വരെ മാത്രം നൽകിയാൽ മതി. 2008 മുതൽ സംസ്ഥാനത്ത് ഇലക്ട്രിക് വാഹനങ്ങൾക്ക് നികുതി ഇളവു നൽകുന്നുണ്ട്.  2019ൽ 3 വർഷത്തേക്കു നികുതി പൂർണമായും ഒഴിവാക്കിയ ഉത്തരവാണ് ഇപ്പോൾ നീട്ടിയത്. സംസ്ഥാനത്തു പ്രതിമാസം 4500 ഇലക്ട്രിക് വാഹനങ്ങളാണ് നിരത്തിലിറങ്ങുന്നത്.