രാജ്യത്ത് സ്വർണാഭരണങ്ങളുടെ വിൽപനയ്ക്ക് രാജ്യത്താകമാനം ഹാൾമാർക്കിങ് നിർബന്ധമാക്കിയതിനുപുറകെ വെള്ളിയാഭരണങ്ങൾ വിൽക്കുന്നതിനും ഹാൾമാർക്കിങ് മുദ്രണം നിർബന്ധമാക്കാൻ നീക്കം. ഇതിൻ്റെ ഭാഗമായുള്ള നടപടിക്രമങ്ങൾ ബ്യൂറോ ഓഫ് ഇന്ത്യൻ സ്റ്റാൻഡേഡ് (ബിഐഎസ്) ആരംഭിച്ചതായാണ് റിപ്പോർട്ട്. ഇതു സംബന്ധിച്ച കേന്ദ്രസർക്കാർ ഉത്തരവ് പുറത്തുവരുന്നതോടെ വെള്ളിയുടെ വിപണനത്തിന് ഹാൾമാർക്കിങ് മാനദണ്ഡം കർശനമാക്കും.
സംസ്ഥാനത്തെ വിപണിയിൽ ഏകദേശം 150 ടൺ വെള്ളിയാണ് ഒരു വർഷം വിറ്റഴിക്കുന്നത്. ആഭരണങ്ങൾ കൂടാതെ അലങ്കാര വസ്തുക്കൾ, പാത്രങ്ങൾ, ഡൈനിങ് സെറ്റ്, ഫർണീച്ചറുകൾ എന്നിങ്ങനെ വെള്ളിയിൽ പണിതീർത്ത വിവിധതരം ഉത്പന്നങ്ങളാണ് വിപണിയിൽ ലഭ്യമാണ്. അതിനാൽ ബിഐഎസ് ഹാൾമാർക്കിങ് നിർബന്ധമാക്കുന്നതോടെ ഇത്തരം ഉത്പന്നങ്ങൾ നിർമിക്കുന്നതിനായി കൃത്യമായ തോതിൽ വെള്ളി ഉപയോഗപ്പെടുത്തിയിട്ടുണ്ടോ എന്ന് ഉപഭോക്താക്കൾക്കും എളുപ്പത്തിൽ മനസിലാക്കാൻ സഹായകരമാകും.
എന്നാൽ വെള്ളിയാഭരണങ്ങളിൽ ഹാൾമാർക്കിങ് മാനദണ്ഡം നടപ്പാക്കുന്നത് സംബന്ധിച്ച അന്തിമ തീരുമാനം കൈക്കൊള്ളുന്നതേയുള്ളു. ആഭരണ വ്യാപാരികളുമായി വിവിധ തലത്തിൽ ചർച്ചകൾ നടത്തിവരികയാണെന്ന് ബിഐഎസ് അധികൃതർ വ്യക്തമാക്കുന്നു.