ഇന്ന് മൊബൈൽ റീചാർജ് മുതൽ ബിൽ പേയ്‌മെന്റുകൾ വരെയുള്ള എല്ലാ കാര്യങ്ങൾക്കും ജനപ്രിയ പേയ്മെന്റ് സംവിധാനമായ ഗൂഗിൾ പേ ഉപയോഗിക്കുന്നു. എന്നാൽ ചില സേവനങ്ങൾ ഉപയോഗിക്കേണ്ടി വരുമ്പോൾ കൺവീനിയൻസ് ഫീസ് നൽകണം എന്നുള്ള കാര്യം പലർക്കും അറിയില്ല. മുൻപ് സൗജന്യമായി നൽകിയിരുന്ന പല സേവനങ്ങൾക്കും ഗൂഗിൾ പേ ഇപ്പോൾ ഉപയോക്താക്കളിൽ നിന്നും ഫീസ് ഈടാക്കുന്നുണ്ട്.
ക്രെഡിറ്റ് – ഡെബിറ്റ് കാർഡുകൾ വഴി വൈദ്യുതി, ഗ്യാസ് ഏജൻസി ബില്ലുകൾപോലുള്ള യൂട്ടിലിറ്റി ബില്ലുകൾ അടയ്ക്കുമ്പോൾ ഉപയോക്താക്കളിൽ നിന്ന് ഇനി പ്രോസസ്സിംഗ് ഫീസ് ഈടാക്കിയേക്കും. ഇത്തരത്തിൽ ഫോൺപേയും പേടിഎമ്മും സമാനമായ ഫീസ് ഈടാക്കുന്നുണ്ട്. ഈ ഫീസ് ഇടപാട് തുകയുടെ 0.5% മുതൽ 1% വരെയാകാം എന്നാണ് റിപ്പോർട്ട്. ഇത് റുപേ കാർഡുകൾ വഴി പണമടച്ചാലും ബാധകമാണ്. എന്നാൽ, ചില ബിൽ പേയ്മെന്റ് വിഭാഗങ്ങളിൽ കാർഡ് പേയ്‌മെന്റുകൾ അനുവദനീയമല്ലെന്ന് ഗൂഗിൾ പേ ഉപയോഗിക്കുന്നവർ ശ്രദ്ധിക്കണം. ഗൂഗിൾ പേ ഉപയോഗിക്കുന്ന വ്യക്തി ഡെബിറ്റ് കാർഡ് വഴി ബിൽ പേയ്മെന്റ് നടത്തുമ്പോൾ മൊത്തം ബിൽ തുകയിൽ ഫീസും കൂടി ഉൾപ്പെടുത്തിയാണ് അടയ്‌ക്കേണ്ടത്. എന്നാൽ യുപിഐ വഴിയാണ് ബിൽ പേയ്‌മെന്റുകൾ നടത്തുന്നതെങ്കിൽ, പ്രോസസ്സിംഗ് ഫീസ് ഈടാക്കില്ല.
നിരവധി മാനദണ്ഡങ്ങൾ ഈ തുക കണക്കാക്കുന്നതിനുണ്ട്. ബിൽ പേയ്മെന്റ് ചെയ്യുന്ന സമയത്ത് ഇത് കൃത്യമായ കാണിക്കും. ബിൽ പേയ്മെന്റ് ഇടപാട് വിശദാംശങ്ങളോടൊപ്പം ഈതുകയും പ്രത്യേകം കാണിക്കും.